تابع .. نشاطاتي

الترم ده اتهرينا نشاطات

عملت عروض اد شعر راسي

وبحوث وتكاليف لما قلت يا كفى

الصورة دي كانت في لقاء قسم الإعلام

مجلة الحائط بتاعتنا كانت عن فلسطين

هههههههههه بضحك لأني افتكرت احنا كنا ناويين نعملها عن ايه الأول

كنا ناويين نعملها عن الكورة ههههههههههه والتعصب الكروي

فجأة كده عرق الوطنية والثورجية والقضية والحرية نط في وشي

فاقترحت على فريق العرب

مريوم ومها وشيمو وسارونة

اننا نعمل عن فلسطين

ووافقوا

 وابتدينا شغل وكرف

كتبنا المقالات

ومريوم اخدت تصمم المجلة بتاعة الحائط الي حنعرضها في لقاء القسم

وانا عملت الاتوجراف ولونت الراجل ده

بعلم فلسطين

صورة الراجل ده هي لوحة فنية لرسام برازيلي اسمو لاتوف كارلوس

أما النشاط التاني الي برضو حبيتو وحبيت الشغل فيه

فكان عبارة عن عرض مع الدكتورة السفيرة

عن قنوات MBC

قنوات الفساد

قسمت العرض لنقاط وقسمنا الشغل بينا

مريوم كالعادة عليها التصميم

وانا ومها كالعادة علينا الشرح

بس المرة دي مريوم شرحت تحت تهديد السلاح هع

العرض بصراحة كان إبدااااع

انا ابتديت الشرح

اتكلمت عن نشأة القنوات

والإعلاميين

ومها اتكلمت عن البرامج وعن النقد

يعني ماخلناش حاجة في ام بي سي وماقلنهاش خصوصا الوحش لأن أصلا مافيش حاجة حلوة

وخبطنا في الحلل لما قلنا يابس

حتى اننا اتوقعنا اننا ننطرد من الكلاس

بس ننطرد ازاي والــ ............. مشفررر

بعد الشرح الدكتورة السفيرة قالتلي

كان شرحك حلو أوي

بس بصراحة استفدنا كتير أوي

وفهمنا ايه هي الإم بي سي

وعرفت تاريخ أغلب الإعلاميين

وفي النهاية بقول

 تسقط شاشة كل العرب

تسقط الإم بي سي

أما عن العمل الجماعي

فدي كانت أول مرة أجربو بجد في حياتي

وكان شعور ممتع لما يتقسم الشغل

وينجز في معاده وكل واحد يقوم بوظيفتو ويبدع فيها

وتاني يوم كل واحد يجيب شغلو

زي لعبة الصور المفككة كل شريحة بتكمل التانية

تابع .. موادي

دي موادي السعيدة

والمادة الاستثنائية جدا

هي دي مادة المستوى الخامس الي أضافتها مها

بحس وانا بكتب اسمها بحالة من الهيام والشوق اللانهائي

المادة دي عبارة عن مجموعة قضايا

  وأحلى قضايا درستها

العولمة : كانت مجرد عملية إمتاعية

درسنا فيها مصطلحات غريبة

كنا بنسمعها ومش بنفهمها

زي الامبريالية والحرب الباردة والأيدلوجيا

افتكر اني لما عرفتها طلعت قلبي بيطنطط من الفرحة

وأي حد مش عاجبني اقولوا ياامبريالي على طول ههههههههههه

ولما آجي اتكلم عن اي فكرة بتدور في عقلي حتى لو كنت بفكر في اني آكل بيتزا بالليل اقول انا ايدلوجياتي بتقول كذا

الفرق بين اني اعرفها بنفسي وبين اني ادرسها هو الاحساس بأنك بتتعلمي حاجة مفيدة

معلومات كبيرة

وانك بقيتي انسانة مهمة في المجتمع

أما الأزمة الاقتصادية : فخرجت وانا باتمنى اننا نمشي على النظام المالي الإسلامي

والإرهاب بقى ههههههههه أصلي افتكرت فيلم اسمو الإرهاب والكباب

أهم مالفت نظري فيه هو تعريف الخارجية الأمريكية للارهاب

وهو بالنص

" عنف تولده دوافع سياسية ضد مدنيين أو عساكر عزل من السلاح لا يقومون بواجب قتالي >>اومال هم جايين يعملوا عندنا ايه بالزبط يقشروا توم وبصل

وتقوم به جماعات وطنية >>> الي يحب وطنو بقى ارهابي يا جدعان

اتاري بقى حماس ارهابية والقسام ارهابي وهنية سفاح ياعيني

واحنا ماكناش عارفين

وحوار الحضارات : أنا حاسة ان قصدهم يقولوا من خلال القضية دي

 انها أشبه بالهدنة بينا وبينهم

ونستغل الوقت ده علشان نطور فيه من ذاتنا والباقي مشفرررر وكفاية كده ماتودناش في داهية ياسرحان

الكلاس بشكل عام كان ممتع أوي وأهم حاجة ان شكلنا كان غللط أوي في المكان

كلهم كبار واحنا صغيرين

علشان كده الدكتورة كل ماتيجي تنادي اسامينا وتحضرنا تقعد تضحك

بشكل عام
كلاس يستاهل بوسة بملازمه بدكتورته بقاعته بتكيفه



تابع .. دكتوراتي

وابتدينا ناخد المحاضرات وشوية شوية نتعرف على الدكتورات

هم كلهم إلى حد ما لا بأس بهمـ

بس أكتر دكتورة لفتت نظري من البداية

ومن أول محاضرة معاها

كانت الدكتورة الي مابتتخطفش لا في الضلمة ولا تحت الشمس

أصل هي دايما تقولنا كده لو حد حاول يخطف منها رد معين أو إجابة معينة وهي مش واخدة بالها

انا كنت بختلف معاها في كل آرائها تقريبا

وكنت حاطاها في دماغي

كل ماتقول حاجة

أظن فيها ظن سيء على طول

لحد ما جه يوم كنت أنا فيه في ورطة بجد

وكنت محتاجة لمساعدة أي حد

كلمتني عنود >>>عنود وفي رواية حنين بنت عسولة أوي وقلبها أبيض بشكل غريب

وقالتلي مالكيش إلا الدكتورة ضد المية يؤ يؤ قصدي ضد الخطف

قالتلي دي دايما تخرج البنات من ورطاتهم

واي مشكلة وقعتي فيها على طول تقف جمبك وتحلهالك

زاد استغرابي عليها

ولما اختبرت أول اختبار في الترم في مادتها
ادتني ورقتين من أصل أربعة
وانا افتكرت ان الاختبار كلو ورقتين بس
وقعدت أحل
والوقت تقريبا خلص فجأة اكتشفت ان البنات معاهم اربع اوراق
لما سألتها
ادتهملي
وقالتلي لو ماكنتيش قولتيلي

كونت اديتك لدرجة على أساس الورقتين دول بس

وقالتلي ماتقلقيش انا هاقعد معاكي ساعة كمان لو حبيتي

ولك تؤبر ألبي

بس انا برضو فضلت متنشنة والمعلومات اتمسحت وحالتي كانت خالطبيطا خالص

وفـ مرة كنت زعلانة على درجة ونص نقصتهم

قعدت ساعتين تقولي وتفهمني اني حاليا في الجامعة

والنقصان ده امر عادي وان الجامعة تختلف عن المدرسة

بس أنا كنت بفكر في حاجة تانية خالص

عايزة أفك الشفرة وأفهمها

هي مستسلمة ولا ثورجية

هي في معسكرنا ولا في معسكرهم

مصيبة لو كانت من انصار احنا آسفين ياريس

المهم جت المحاضرة الي تقريبا خلتني أغير فكرتي عنها

محاضرة كانت في مادة القضايا

كنا بنتكلم في حوار الحضارات

سألتنا سؤال أول مرة اتسأله في حياتي

لو كنت مع وحدة مش مسلمة في اصنصير

وسألتك ايه هو الإسلام ؟

المفروض انك تردي في دقيقة هتقولي ايه ؟ 



كمان علمتني

ازاي اخاطب الغرب

بخطاب عقلاني منطقي بعيد عن العاطفة

اكمن الغرب مابيحسوش واهم حاجة عندهم المصلحة

المحاضرة دي كانت نقطة تحول كبيرة

غيرت نظرتي ليها

ابتديت أحس ان احنا إذا اختلفنا مع حد بلاش نكرهه وبلاش نقفل من ناحيته

ممكن نحاوره ونحبه

هو تلقائي هيبقى معانا

يعني نطبق مبدأ

ادفع بالتي هي أحسن

ومعاها عرفت نوع آخر من الناس
النوع الدبلوماسي

بس بجد هي دكتورة وتستحق لقب دكتورة ده
في مرة مريوم قالتلي
المفروض تكون هي رئيسة القسم
عارضتها و قولتلها
مش شرط ممكن تكون في الشغل الإداري مش كويسة

ده لأني ساعتها ماكنتش بقدر أفصل مابين الاختلاف في الآراء ومابين الخصومة الشخصية

بس انا معاها اتعلمت ده كويس
واتعلمت منها حاجات كتير برضو
هي اساسا شخصية مستفزة
يعني افتكر بعد اي محاضرة ليها كنا بنطلع نتناقش ونتخانق وتطلع افكار جديدة
وثقافات جديدة
وكان بيبقى نقاش مثمر وممتع
مش ممكن أنسى لها ده أبدا

باقي الدكتورات مااستفزونيش لحد دلوقتي علشان اكتب عنهم

تابع ..

لما رحت أنا ومريم ومها علشان نرتب الجدول مع بعض

كنت حاسة اني ضايعة وخايفة

والاحساس ده متوقع جدا في بداية كل سنة دراسية بالنسبالي

الغريب انو نفس الاحساس بنفس الشكل من لما كنت في ابتدائي لحد دلوقتي ماتغيرش

وجع في البطن وقلق وتفكير مستمر

قسم الإعلام مش زي أي قسم في الجامعة

مكانو غريب

صغنون أوي وابوابه خشب عامل زي الاستديو بالزبط

كأنو لوكيشن تصوير

أول حاجة عرفتها ان الكادر التعليمي كلو مصري

ماعدا رئيسة القسم

طبعا احنا مش عارفين أي حاجة في أي حاجة

لا المادة دي ايه

ولا مع مين

اهم حاجة اننا نفتح الأودس نلاقي جدول محطوط وخلاص

وبعد اللخبطة

خلينا مها ترتبلنا الجدول >>>مش قولتلكو تلاقوها في الأزمات

وطبعا إيمانا من مها ان معاها اتنين يهدوا جبال من الشطارة

راحت اختارتلنا مادة من المستوى الخامس

اسمها قضايا إعلامية معاصرة

أهم حاجة في بال مها كانت انها تملى الفراغ الي من الساعة 11 لـ الساعة 12 الضهر

الغريب ان المادة دي هي الي حببتنا في القسم

والمادة الوحيدة الي فرغنا فيها طاقاتنا المكنونة وكتبنا مقالات واتنشرت في مجلة القسم كمان

وده كان الجدول

أخيرا نزل

بس بصراحة لو قعدت سنتين قدام ماكنتش هاعرف اعمل زيو

بجد بجد مها كانت مبدعة في تنسيق الجدول

البريكات لا هي كتيرة ومملة ولا قليلة

بنروح البيت بدري

وكلو زي الفل

يعني 2 في 1

يتبع ....

مذكرات إعلامية .. الترمـ الأول

الترم ده مر بسرعة أوي .. لسه فاكرة قبل شوية شكلنا واحنا بنرتب الجدول .. فكري لسه مشوش ومش قادرة أكون فكرة كاملة عن القسم ..

قسم الإعلام حلو ووحش وممتع وممل في نفس ذات الوقت

بحس فيه بشعور اللخبطة لحد السعادة

يعني انا مش عارفة انا عايزة أطلع ايه

صحفية ولا مخرجة ولا معدة ولا محررة

بس انا عايزة أطلع كل حاجة

وطول ماانا جوة الكلية انا بدور على نفسي

قبل ماابتدي الحكاية هاعرفكم على الشخصيات الي معاية رفيقات الكفاح

أمي وفي رواية مامي :

ماما أم عظيمة وهي معايه في كل لحظات حياتي وفي كل كلمة من حكاياتي

ساعات لما بنستخدم كلمة في غير محلها أو بنقولها على سبيل المجاملة نحتاج ان احنا نقول وراها كلمة أوي أو بجد

علشان نرجع لها بريقها تاني

ماما بقى إنسانة عظيمة بجد

ده كان أسريا

أما على الصعيد الصديقات

فـ

سلسلبيل : الغائبة الحاضرة

كل ذكرياتي الاعدادية والثانوية وحتى الجامعية سلسبيل جزء منها

وكنا دايما بنكمل بعض في كل حاجة

سهيلة وبروايتي سوهيلا :

مش هقول غير ان فكرت ابطل ادخل إعلام وأدخل معاها كليتها مع ان ماليش علاقة بالكلية ولا بالمجال نهائيا

 شبهي أوي في الأفكار وفي الآراء

وكل ليالي الثورة الـ 18 يوم قضيناها مع بعض على المسن بنطمن بعض

اتنين مش ممكن نقدر نفصلهم عن بعض

نقدر نقول توم وجيري

ينفع توم من غير جيري .. لا ماينفعش

دول مريم ومها

مريوم : ماشية معاية على طول الخط خصوصا في السياسة والكلام الكبير وهي بالمناسبة شاعرة جامدة جدا
لا أحب تثنية الأشياء
والحلم يمنحني مش عارفة ايه بالليل ههههههههه وحاجات كده
بس بجد تحسي وانت قاعدة معاها انك قاعدة قدام وحدة فاهمة ومثقفة  

مها : مالية مركزها خصوصا في الأزمات .. تحسي بجد لما يكون في أزمة ان عندك حد ممكن تحكيله وتستشريه

والرأي دايما بيكون سديد

شيماء وبروايتي شيمو : شخصية مسؤولة .. عارفة أبعادها كويس

وبتحاول تخرجني دايما من مزاجاتي المتعكرة 

نطلع بره شوية .. بره القسم

سامية الإنجليزية : قسم إنجليزي وفرنسي وحركات

سامية شخصية ماشاء الله واعية ولما تتكلمي معاها تحسي ان قدامك شخص ناضج وفاهم

سامية بتحسسني بالرويات الأدبية خاصة اسمها

رؤى وبروايتي الريشة : هي لحد دلوقتي لسه مااستقرتش على كلية

بس أنا بالأصالة عن نفسي ونيابة عن أحساسي

بقول انا حاسة انها لو ركزت هتبقى حاجة كبيرة

دي كل الشخصيات لحد دلوقتي

يتبع .... 



آخر يومـ

Happy Last Day To You  ..... TshaTshaTshaaa

Happy Last Day To You  ..... TshaTshaTshaaa

   Happy Last Day  

 Happy Last Day

Happy Last Day To You  ..... TshaTshaTshaaa

سنة خلصت ياجميل

سنة خلصت ياجميل

سنة خلصت .. سنة خلصت .. سنة خلصت ياجميل

يلا حالا بالا حالا حيو البكالريوس

هيكون عيد ميلاده الليلة أسعد الأعياد فليحيا البكالريوس

يتبع ...